კლასნიჩი საქართველოსთვის სრული დატვირთვით ვერ ემზადება
ხორვატიის ნაკრების თავკაცმა სლავენ ბილიჩმა საქართველოსთან ევროშესარჩევი მატჩისთვის ერთი ცვლილება მოახდინა – ტრავმირებული მლადენ პეტრიჩის ნაცვლად, ინგლისური "ბოლტონის” ფორვარდი ივან კლასნიჩი გამოიძახა. ეს ორი დღის წინანდელი ამბავია, თუმცა ბილიჩს "თხა ვიყიდე, თხა გავყიდე”-სავით გამოუვიდა, რადგან სრული დატვირთვით ვერც კლასნიჩი ვარჯიშობს.
"ეს დიდი მოულოდნელობა იყო. ბედნიერი ვიყავი, სლავენ ბილიჩის ზარი რომ შემოვიდა ჩემს ტელეფონში”, – თქვა კლასნიჩმა, ვისაც თითქმის ორი წელია, ნაკრებში არ უთამაშია.
დღეს კი index.hr-ზე გაჩნდა ინფორმაცია, რომ კლასნიჩს მუხლი ოდნავ აწუხებს და სრული დატვირთვით ვერ ვარჯიშობს.
პეტრიჩისგან განსხვავებით, კლასნიჩი კლასიკური ცენტრფორვარდია და სიღრმიდან თამაში დიდად არ ეხერხება. "ბოლტონის” თავდამსხმელმა გასულ პრემიერლიგურ სეზონში 29 მატჩი ჩაატარა და 7 გოლი გაიტანა, ხოლო ხორვატიის ეროვნულ გუნდში ასეთი სტატისტიკა აქვს – 39 თამაში, 12 გოლი.
|
