ორთვიანი პაუზის შემდეგ, სამშაბათს ჩემპიონთა მერვედფინალური შეხვედრებით განახლდება. ამ ეტაპის ყველაზე საინტერესო "არსენალისა" და "ბარსელონას" წყვილია. მათი პირველი შეხვედრა 16 თებერვალს ლონდონში გაიმართება, საპასუხო მატჩი კი 8 მარტს კატალონიაში ჩატარდება. მომავალ დაპირისპირებასთან დაკავშირებით თავისი აზრი "მეთოფეთა" თავკაცმა, არსენ ვენგერმა გამოთქვა. უმრავლესობის მსგავსად, წყვილში ფავორიტად ფრანგი სპეციალისტიც "ბარსას" მიიჩნევს.
"ნებისმიერი გუნდი, რომელიც ჩემპიონთა ლიგის გათამაშებიდან "ბარსელონას" გამოთიშვას მოახერხებს, თვითონვე იქცევა ტურნირის უმთავრეს ფავორიტად. ურთულესი შეხვედრები გველის. შესანიშნავი იქნება, თუკი კატალონიელთა ძლევას შევძლებთ. გვარდიოლას საოცარი გუნდი ჰყავს, რომელიც ულამაზეს ფეხბურთს თამაშობს. მომავალ დაპირისპირებაში ფავორიტად "ბარსა" მივიჩნევ. ასევე ფიქრობს სპეციალისტთა უმეტესობაც, რაც ჩვენ ფსიქოლოგიურ ტვირთს გვიხსნის. თუმცა, მეორე მხრივ, ჩემი ფეხბურთელები ძალიან ამბიციურები არიან, რომლებიც ნებისმიერ მეტოქესთან მხოლოდ გამარჯვებისთვის იბრძვიან. მათ ძალიან უნდათ "ბარსას" დამარცხება და საფეხბურთო სამყაროსთვის საკუთარი შესაძლებლობების დამტკიცება", - ციტირებს ვენგერს "მეთოფეთა" ოფიციალური ვებ-გვერდი.
ბოლოს შეგახსენებთ, რომ ეს გუნდები ერთმანეთს ჩემპიონთა ლიგის 2005-06 წლების გათამაშების ფინალში შეხვდნენ. პარიზში გამართულ სატიტულო შეხვედრაში ლონდონელები სოლ კემპბელმა დააწინაურა, თუმცა, შემდეგ ეტოომ და ბელეტიმ ხუთ წუთში ორჯერ მოახერხეს "არსენალის" კარის აღება და "ბარსელონას" ლიგა მეორედ მოაგებინეს. მას შემდეგ კატალონიელებმა ევროპის ყველაზე პრესტიჟულ საკლუბო ტურნირში 2009 წელსაც იმარჯვეს.